Жамбыл облысында жол апатынан полиция қызметкері қаза тапты

11 ақпан күні Жамбыл облысында  «Алматы-Ташкент» автожолының 203-шақырымында «Volkswagen Passat» көлігінің жүргізушісі қарама-қарсы бағытқа шығып, жол қауіпсіздігін қамтамасыз етіп жүрген патрульдік полиция көлігімен соқтығысқан.

Апат салдарынан патрульдік көліктегі екі полиция қызметкері түрлі жарақаттармен Қордай аудандық орталық ауруханасына жеткізілді. Өкінішке қарай, Жамбыл облысы ПД патрульдік полиция батальонының аға инспекторы, полиция аға лейтенанты Абай Үшкемпір 12 ақпан күні жансақтау бөлімінде көз жұмды.

Ішкі істер органдарында 2017 жылдың 14 желтоқсанынан бері қызмет еткен Абай Бақытбекұлы биылғы 6 ақпанда қазіргі қызметіне тағайындалған. Ол еңбек жолында 9 мәрте марапатталған.

Жамбыл облысы Полиция департаменті марқұмның жақындары мен туған-туыстарына қайғырып, көңіл айтты. Құқық қорғау органдары жол апатына байланысты тергеу амалдарын жүргізуде.