Жамбыл облысында спорттық жиынға барған 22 жасөспірім ауруханаға түсті

Жамбыл облысының Меркі ауданында күрестен оқу-жаттығу жиынына қатысқан 22 бала шұғыл ауруханаға жеткізілді. Бұл туралы SHYNDYK.KZ ақпараттық порталы хабарлайды.

Дәрігерлердің алдын ала қойған диагнозы - «этиологиясы анықталмаған гастроэнтерит». Зардап шеккен жасөспірімдердің жасы 12 мен 17 аралығында.

Жамбыл облысы әкімдігінің мәлімдеуінше, қазіргі таңда аурудың себебін анықтау мақсатында науқастардан және олар тұтынған тағамдардан зертханалық сынамалар алынған. Тиісті сараптама нәтижелері күтілуде.

«Облыстық санитарлық-эпидемиологиялық бақылау департаменті аталған факті бойынша тиісті тексеру жұмыстарын жүргізіп жатыр. Барлық балалар дәрігерлердің бақылауында, құзырлы органдар тарапынан қажетті шаралар қабылдануда», — деп хабарлады өңір әкімдігі.

Оқиға орын алған демалыс аймағында барлығы 100-ден астам жас спортшы мен 13 жаттықтырушы болған. Мамандар қалған балаларды да медициналық тексеруден өткізді. Олардан ауру белгілері байқалмаған, дегенмен профилактикалық жұмыстар жалғасуда.

Аталған дерек Меркі аудандық полиция бөлімінде тіркелді. Тексеру қорытындысы бойынша процессуалдық шешім қабылданатын болады. Жағдайды бақылау үшін оқиға орнына облыс әкімінің орынбасарлары аттанды.