Жамбыл облысында сарбаз қаза тауып, қылмыстық іс қозғалды

Жамбыл облысында мерзімді әскери қызмет атқарып жүрген сарбаздың өліміне байланысты қылмыстық іс қозғалды. Бұл туралы ҚР Ішкі істер министрлігі Ұлттық ұланының баспасөз қызметі хабарлады.

Ведомство мәліметінше, 2026 жылғы 6 қаңтарда сарбаздың жүрегі кенеттен тоқтаған. Дәрігерлердің көрсеткен көмегіне қарамастан, ол ауруханада көз жұмды. Алдын ала диагноз ретінде «жедел лейкоз» аталған.

Ұлттық ұланның хабарлауынша, әскери қызметші бұған дейін Шымкент қаласында қызмет еткен кезінде дәрігерлердің бақылауында болып, медициналық тексерулерден өткен.

Ұлттық ұланның қолбасшылығы мен жеке құрамы марқұмның отбасы мен жақындарына көңіл айтты.

Оқиғаға байланысты әскери-тергеу басқармасы қылмыстық іс қозғады. Ресми дерекке сәйкес, бұл жағдай ҚР Ішкі істер министрінің орынбасары – Ұлттық ұланның Бас қолбасшысы Аңсаған Балтабековтің жеке бақылауында.