Жамбыл облысында ауыл жастарының әлеуетін арттыруға арналған ауқымды форум өтті

Жамбыл облысы Тараз қаласындағы «Талбесік» этноорталығында 29–30 мамыр күндері «Auyl Jastary» республикалық жастар форумы өтті. Ауқымды іс-шараға еліміздің барлық өңірлерінен 300-ге жуық белсенді ауыл жастары, «Ауыл» партиясы жастар қанатының өкілдері, жас мәслихат депутаттары, студенттік жасақ жетекшілері мен қоғам белсенділері қатысты.

Форумның негізгі мақсаты – ауыл жастарының көшбасшылық әлеуетін арттыру, өңіраралық ынтымақтастықты нығайту және ауылдық аумақтарды дамытуға бағытталған жаңа бастамаларға қолдау көрсету.

Форумның ашылу салтанатында Қазақстан Республикасы Парламенті Мәжілісінің депутаты, Аграрлық мәселелер комитетінің және «Ауыл» партиясының Төрағасы Серік Егізбаев сөз сөйледі. Ол мемлекет басшысының бастамасымен жүзеге асып жатқан саяси реформалар мен алдағы 2026 жылдың «Цифрландыру және жасанды интеллект жылы» болып жариялануы жас ұрпақтың дамуына тікелей бағытталғанын атап өтті:

«Мемлекеттік саясат жас ұрпақтың әлеуетін толық ашуға, өз идеялары мен бастамаларын жүзеге асыруға, жан-жақты өзін-өзі дамытуына және жеке әрі ел дамуына үлес қосуына жағдай жасауға бағытталған. Бұл форум – өңірлерден келген бастамашыл жастарды біріктіретін, ауылдық аумақтарды дамыту мен цифрлық трансформация үдерістеріне жастарды тартуға бағытталған практикалық шешімдер ұсынатын алаң», — деді Серік Егізбаев.

Сонымен қатар іс-шара барысында Парламент Мәжілісінің депутаттары Ерболат Саурықов, Мұқаш Ескендіров, Әбутәліп Мутәлі, «Auyl Jastar» жастар қанатының төрағасы Дәурен Рахымбек және бірқатар салалық сарапшылар мен менторлар баяндама жасап, қатысушыларға қолдау білдірді.

Екі күнге созылған форум аясында жастардың практикалық дағдыларын жетілдіруге арналған тимбилдингтер, семинар-тренингтер және зияткерлік пікірталастар ұйымдастырылды. Бағдарламаның екінші күні негізгі үш тақырыптық бағыт бойынша жалғасты:

•  «AI Education Talks: Білімге жаңа көзқарас» – білім беру жүйесіндегі жаңа технологиялар мен жасанды интеллекттің рөлі талқыланды.
•  «Business Talks: Идеядан табысқа» – ауылдық жерлерде кәсіпкерлікті дамыту және агробизнесті несиелеу мүмкіндіктері сөз болды.
•  «Motivation Talks: Жастарға серпін» – тұлғалық даму мен қоғамдық көшбасшылықты қалыптастыру мәселелеріне арналды.

Форумға қатысушы Жамбыл облысының өкілі Едіге Өсер өз сөзінде бұған дейін алған IT бағытындағы білімін ветеринария саласындағы республикалық «VetPro» кәсіби байқауында қолданып, жүлделі II орынға ие болғанын айтып, мұндай шаралардың жастар үшін нақты нәтиже беретін тиімділігін жоғары бағалады.

«Auyl Jastary» форумы ауыл жастарын заманауи білім мен технологияларды меңгеруге ынталандыратын және ел дамуына жауапкершілікпен қарайтын орта қалыптастыруға бағытталған маңызды диалог алаңына айналды. Шара соңы қазақстандық эстрада жұлдыздарының қатысуымен өткен «Auyl Party» концерттік бағдарламасымен қорытындыланды.

«Ауыл» партиясы алдағы уақытта да жастардың зияткерлік және шығармашылық әлеуетін қолдауға бағытталған жобаларды жүйелі түрде жүзеге асыруды жалғастыратынын мәлімдеді.