Жамбыл облысында 19 жастағы сарбаз көз жұмды

Жамбыл облысы Мәтібұлақ ауылындағы 01098 әскери бөлімінде мерзімді қызметтегі сарбаздың мәйіті табылды. Әскери бөлім басшылығы марқұм өз-өзіне қол жұмсады деген нұсқаны ата-анасына хабарлаған. Бұл жөнінде Halyqstan жазды.

Қаза тапқан сарбаз – Шымкент қаласының тұрғыны Дінмұхаммед Шынарбек. Оның әпкесі Еңлік Қалтаеваның айтуынша, өткен жылы әскер қатарына Дінмұхаммедтің сыңары Даниял Шынарбек шақырылған. Биыл көктемде Дінмұхаммед те әскерге кетіп, бауырымен бірге Отар гарнизонында қызмет еткісі келген. Алайда ант қабылдағаннан кейін оны белгісіз себеппен 01098 әскери бөліміне ауыстырған.

"29 тамызда ғана 19 жасқа толды. Еңбекқор, мейірімді, болашағына үлкен жоспар құрған бала еді. Біз отбасымызбен оның өз-өзіне қол жұмсағанына сенбейміз. Президентке жүгініп, Дінмұхаммедіміздің қазасына қатысты әділ тергеу жүргізілуін сұраймыз. Ол Отанға қызмет етуге барды, өлу үшін емес", – деді марқұмның әпкесі Еңлік Қалтаева.