Жалған айыппұл: Полиция жүргізушілерді жаңа алаяқтық түрінен сақ болуға шақырды

Қазақстандық жүргізушілерге айыппұл туралы жалған хабарламалар тарауы мүмкін, деп ескертеді Ішкі істер министрлігі. Мұндай алаяқтық сызбасы алғаш Ресейде тіркелген, ал қазір оның Қазақстан аумағына да жетуі ықтимал.

Polisia.kz мәліметінше, интернет-алаяқтар көлік иелеріне электронды пошта немесе мессенджер арқылы хабарлама жібереді. Онда жүргізушінің аты-жөні, көлік нөмірі және «айыппұлды төлеу» сілтемесі көрсетіледі.

Өз деректерін көрген адам ақпаратқа сеніп, сілтемеге өтеді немесе тіпті банк картасының деректерін енгізіп, ақшасын жоғалтады. Полицияның айтуынша, бұл – фишинг, яғни азаматтың жеке мәліметтері мен банк шоттарын ұрлауға бағытталған әрекет.

«Кей жағдайларда мұндай сілтемелер вирустық бағдарламаларды орнатып, телефон немесе компьютердегі деректерге қол жеткізуге мүмкіндік береді», – дейді киберқылмысқа қарсы мамандар.

АҚШ пен Ресейде мұндай қылмыстардың жиілегені байқалады. Сондықтан қазақстандық мамандар бұл әдіс елімізде де таралуы мүмкін деп ескертеді.

Полицияның ресми ескертуі:

• Қазақстанда айыппұл туралы хабарламалар тек 1414 нөмірінен келеді;

• Ресми хабарламада төлем сілтемесі болмайды;

• Айыппұлды тек egov.kz, qamqor.gov.kz сайттарынан немесе банктердің мобильді қосымшасы арқылы тексеруге болады.

Егер күмәнді хабарлама алсаңыз, сілтемеге өтпеңіз және ешқандай файл ашпаңыз. Банк картасы деректерін енгізіп қойған жағдайда, дереу картаны бұғаттап, банкке және полицияға (102 нөмірі арқылы) хабарласу қажет.