Жалақы өседі: Үкімет халық табысын арттырудың жаңа тетіктерін дайындап жатыр

Қазақстан Республикасының Президенті Қасым-Жомарт Тоқаевтың төрағалығымен өткен Үкіметтің кеңейтілген отырысында Премьер-министр Олжас Бектенов азаматтардың табысын арттыруға бағытталған жаңа шаралар туралы баяндады.

Үкімет басшысы халықтың табыс деңгейінің өсуі экономиканың жалпы өсім қарқынымен сәйкес келмей отырғанын атап өтті. Қазіргі таңда еңбекақының жалпы ішкі өнімдегі үлесі шамамен 31 пайызды құрайды. Бұл Орталық Азия елдері үшін жоғары көрсеткіш болғанымен, Үкіметтің мақсаты – оны әлемдік орташа деңгейге, яғни 40 пайызға және одан жоғары көрсеткішке жеткізу.

Олжас Бектеновтің айтуынша, жалақының өсу қарқыны бизнестің табыс динамикасынан, оның ішінде мемлекеттік қолдау есебінен алынған кірістерден де төмен қалып отыр. Осыған байланысты Үкімет азаматтардың табысын арттыруға бағытталған кешенді шаралар әзірлеп жатыр.

Жоспарланған шаралар қаржылық және салықтық ынталандыруды қамтиды. Олар еңбекақыны көтеруге, лайықты жалақы төлейтін жұмыс орындарын көбейтуге, кәсіби дағдылар мен біліктілікті дамытуға, сондай-ақ халық үшін қаржылық жүктемені азайтуға бағытталмақ.

Үкіметтің 2026 жылға арналған негізгі басымдығы – азаматтардың нақты табысының өсуін қамтамасыз ету. Бұл мақсатқа жаңа өндірістер ашу, кәсіпкерлікті қолдау және тұрақты жұмыс орындарын құру арқылы қол жеткізу көзделіп отыр.

Сондай-ақ отырыста цифрландыру мәселесіне ерекше назар аударылды. Мемлекет басшысы жариялаған цифрландыру жылы аясында экономиканың барлық саласына озық технологиялар мен жасанды интеллект енгізу міндеті қойылған. Алайда Премьер-министр бұл бағыттағы жұмыстардың әлі де жеткіліксіз екенін атап өтті.

Экономиканың нақты секторында цифрландыру процестері бастапқы кезеңде қалып отыр, ал салалық деректер қорлары толық жүйеленбеген. Бұл түйткілдердің барлығы Үкімет әзірлеп жатқан Digital Qazaqstan стратегиясы аясында шешімін табуы тиіс. Стратегия барлық цифрлық бастамаларды біртұтас ұлттық бағдарламаға біріктіруді көздейді.