Жағдайды біле тұра шара қабылдамаған: Air Astana бала өліміне қатысты сотта жеңіліп қалды

Алматы қаласында сот Air Astana әуе компаниясына қарсы шағым бойынша шешім шығарды. Бұл іс баласы қайтыс болған отбасының арызы негізінде қаралды. Бала ұшақпен ұшқаннан кейінгі күні ауруханаға түсіп, көп ұзамай көз жұмған.

Соттың мәліметінше, 2019 жылы туған бала ауыр жағдайда, ес-түссіз күйде ұшақпен Алматыға жеткен. Бірақ әуежай қызметкерлері оған арнайы медициналық көлік емес, мүгедектерге арналған арбаны ұсынған. Бұған қоса, ата-анасы алдын ала келіскен жеке реанимобиль мен дәрігерді әуежай аумағына кіргізбей қойған. Жедел жәрдем де шақырылмаған.

Нәтижесінде бала амбулифт деп аталатын арнайы техниканың көмегімен ұшақтан терминалға жеткізілген. Алайда бұл техника ауыр хәлдегі науқастарды тасымалдауға арналмаған.

Сот мәлімдемесінде көрсетілгендей, бала өздігінен қозғала алмайтын жағдайда болған, ал паспорттық бақылау медпункт арқылы жүргізілуі тиіс еді. Бірақ авиакомпания бұл туралы әуежайға алдын ала ескерту жасамаған.

Шекара бақылауынан өту кезінде балаға көзіндегі арнайы медициналық таңғышты күштеп шешіп тастаған. Келесі күні бала екі өкпесінің қабынуынан ауруханаға жатқызылып, ақпанда қайтыс болған.

Сот баланың ата-анасының моральдық зиян өндіріп беру туралы талабын жартылай қанағаттандырды. Әуе компаниядан 5 миллион теңге көлемінде өтемақы өндірілетін болды. Бұл шешім әлі заңды күшіне енген жоқ.