Зейнетақы жинағын тіс емдеуге пайдалану мүмкіндігі жыл соңына қарай қайтарылуы мүмкін

Қазақстандықтарға зейнетақы жинақтарының бір бөлігін стоматологиялық қызметтерге пайдалану мүмкіндігі тек 2026 жылдың соңына қарай қайта іске қосылуы мүмкін. Бұл туралы Үкіметтегі брифингте «Отбасы банк» басқарма төрайымы Ләззат Ибрагимова мәлімдеді.

Оның айтуынша, өтінімдерді қабылдау 15 сәуірге дейін тоқтатылғанымен, осы уақытқа дейін арнайы сайтты іске қосу мүмкін болмай отыр.

– Қазір біз Денсаулық сақтау министрлігімен тығыз жұмыс істеп жатырмыз. Біздің мақсат – бұл қызметті қолжетімді әрі толық ашық ету. Өкінішке қарай, қаражатты мақсатсыз пайдаланған 10 пайыз адамның кесірінен 90 пайыз азамат бұл мүмкіндіктен айырылды. Бұл әділетсіз деп ойлаймын, – деді Ибрагимова.

Оның сөзінше, қазір зейнетақы жинақтарын стоматологиялық және басқа да медициналық қызметтерге пайдалану үдерісін толықтай онлайн форматқа көшіру жұмыстары жүргізіліп жатыр. Жүйені осы жылдың соңына дейін іске қосу жоспарланған.

Жаңа жүйеде стоматологиялық және басқа медициналық клиникалар тіркеліп, көрсетілген қызмет туралы акт онлайн түрде рәсімделеді. Сонымен қатар жүйе Денсаулық сақтау министрлігімен біріктіріліп, барлық операцияның ашықтығы қамтамасыз етіледі.

Ләззат Ибрагимова 15 сәуірге дейін жаңа портал іске қосылмайтынын да атап өтті. Оның айтуынша, қазіргі уақытта банк үшін тұрғын үй кезегіне қатысты мәселелер басым болып отыр. Ал медициналық қызметтерге байланысты жобаны іске асыру осы жылдың үшінші немесе төртінші тоқсанына жоспарланған.

Еске салайық, 2025 жылдың 15 қыркүйегінен бастап қазақстандықтар зейнетақы жинақтарының артық бөлігін тіс протездеу мен имплантация қызметтеріне пайдалана алмайды. Денсаулық сақтау министрлігі бұл шешімді медициналық құжаттарды қолдан жасау және қаражатты мақсатсыз пайдалану жағдайларының көп болуымен түсіндірген.

Кейін осыған ұқсас себептермен офтальмологиялық қызметтерге, сондай-ақ реконструктивті және пластикалық операцияларға зейнетақы қаражатын пайдалану бойынша өтінімдер қабылдау да тоқтатылған.

Ал сирек кездесетін ауруларды емдеу, радионуклидті және радиойод терапиясы, радиохирургиялық және протондық терапия сияқты өмірлік маңызды әрі қымбат ем түрлері қолжетімді болып қалған еді. Алайда 12 қаңтардан бастап «Отбасы банк» платформасында емделуге арналған зейнетақы қаражатын алу бойынша өтінімдер қабылдау да уақытша тоқтатылды.