Зейнетақы жинағын тіс емдеуге қолдану толығымен тоқтатылуы мүмкін

Денсаулық сақтау министрлігі зейнетақы жинақтарын стоматологиялық қызметтерге қолдану мүмкіндігін алып тастау туралы ұсыныс енгізді. Ведомство тиісті бұйрық жобасын "Ашық НҚА" порталында жариялады.

Министрлік мұндай бастаманы алаяқтықтың көбейгенімен түсіндірді.

"Жобада зейнетақы жинағынан біржолғы төлемдерді стоматологиялық қызметтерге (тіс протездеу, имплантация) пайдалану нормасын алып тастау қарастырылған. Себебі жинақтардың мақсатсыз жұмсалған жағдайлары тіркелді", – делінген құжатта.

Жоба 30 қыркүйекке дейін көпшілік талқылауында болады.

Биыл 27 сәуірден бастап емдеуге арналған біржолғы зейнетақы төлемдерін пайдалану ережелеріне өзгерістер енгізілген болатын. Бұл шаралар құжаттарды қолдан жасау мен қаражатты мақсатсыз пайдалану деректерінің көбейгенінен кейін бақылауды күшейту үшін қабылданды.

9 қыркүйекте Қаржылық мониторинг агенттігінің төрағасы президентке зейнетақы жинақтарын пайдалану кезінде анықталған заң бұзушылықтар туралы баяндады. Агенттік дерегінше, БЖЗҚ-дан стоматологиялық қызметтерге деп, негізсіз 200 млрд теңге шығарылған.

Ал 15 қыркүйектен бастап «Отбасы банк» тіс емдеуге зейнетақы төлемін пайдалану үшін өтініш қабылдауды уақытша тоқтатты. Сол күні Атырау облысында зейнетақы жинағын заңсыз шығаруға көмектескен бес қылмыстық топ әшкереленгені хабарланды. Олар 30-дан астам стоматологиялық клиниканы пайдаланған.