Зейнетақы жинағын кімге сеніп тапсыру керек? Ұлттық банк басшысы кеңес берді

Ұлттық банк төрағасы Тимур Сүлейменов зейнетақы жинағын жеке инвестициялық басқарушыларға беруді жоспарлаған қазақстандықтарға олардың жұмыс нәтижесін алдын ала мұқият зерделеуге кеңес берді.

Еңбек министрлігінің бұған дейінгі мәліметінше, 2026 жылғы қыркүйектен бастап азаматтар зейнетақы жинағының 100%-ына дейін жеке басқарушыларға бере алады. 2023 жылдан бері жинақтың 50%-ына дейін ғана беруге рұқсат етілген.

Сүлейменовтің айтуынша, шешім қабылдамас бұрын азаматтар зейнетақы жүйесінің қалай жұмыс істейтінін түсініп, инвестициялық басқарушылардың мәлімдеген шарттарын, бұрынғы нәтижелерін және қаражатты қай бағыттарға салатынын салыстыруы қажет.

«Инвестициялық басқарушылардың сайттарына кіріп, олардың декларацияларын, не ұсынатынын, бұған дейін қандай нәтиже көрсеткенін қараңыздар. Мұның бәрі өз инвестициялық шешіміңізді қабылдау үшін қажет», – деді Ұлттық банк төрағасы.

Ол зейнетақы жинағының 100%-ын жеке басқарушыға беру міндет емес екенін атап өтті. Тәуекелі төмен тәсілді қалайтын азаматтар қаражатын Бірыңғай жинақтаушы зейнетақы қорының басқаруында қалдыра алады. Ал тәуекелге баруға дайын салымшылар табысы жоғары болуы ықтимал инвестициялық бағыттарды таңдай алады.

Сүлейменов жоғары табысқа ұмтылу тәуекелді де арттыратынын ескертті. Оның сөзінше, жеке басқарушылардың барлығы Қаржы нарығын реттеу және дамыту агенттігінің лицензиясымен жұмыс істейді және агенттік бақылауында болады.

«Зейнетақы шоты – әр адамның жеке шоты. Сондықтан жауапкершілік те азаматтың өзіне жүктеледі. Бірақ таңдау мүмкіндігінің болғаны жақсы», – деді ол.