Зеленский соғысты тоқтатуға бағытталған 20 тармақтан тұратын жоспарды жариялады

Украина президенті Владимир Зеленский Ресейдің Украинаға қарсы соғысын аяқтауға бағытталған 20 тармақтан тұратын бейбітшілік жоспарын алғаш рет ашық түрде жариялады. Бұл туралы «Укринформ» агенттігі мен «Суспільне» телеарнасы хабарлады. Зеленскийдің айтуынша, құжат framework – соғысты аяқтауға арналған базалық саяси келісім болып табылады және Украина, АҚШ, Еуропа елдері мен Ресей арасында талқыланып жатыр.

Бейбітшілік жоспарының 20 тармағы:

1. Украина егемендігі толық көлемде қайта расталады. Украина – тәуелсіз мемлекет екені барлық тараптармен ресми түрде мойындалады.

2. Ресей мен Украина арасында толық әрі сөзсіз шабуыл жасамау туралы келісім жасалады.

3. Жанасу шебін бақылау үшін ғарыштық және ұшқышсыз мониторингке негізделген халықаралық бақылау тетігі енгізіледі.

4. Украина сенімді қауіпсіздік кепілдіктеріне ие болады.

5. Бейбіт кезеңде Украина Қарулы күштерінің саны 800 мың адамды құрайды.

6. АҚШ, НАТО және еуропалық мемлекеттер Украинаға НАТО-ның 5-бабына ұқсас қауіпсіздік кепілдіктерін береді.

7. Ресей Еуропа мен Украинаға қарсы шабуыл жасамау саясатын өз заңнамасында бекітеді.

8. Украина нақты белгіленген мерзімде Еуропалық одаққа мүше болады.

9. Украина қысқа мерзімде ЕО нарығына артықшылықты қолжетімділік алады.

10. Украина экономикасын дамытуға арналған ауқымды инвестициялық пакет қабылданады.

11. Экономиканы қалпына келтіру және гуманитарлық мәселелер үшін бірнеше арнайы қор құрылады. Жалпы инвестиция көлемі – 800 млрд долларға дейін.

12. Украина АҚШ-пен еркін сауда туралы келісімге қол қою үдерісін жеделдетеді.

13. Украина өзінің ядролық қарусыз мәртебесін ресми түрде растайды.

14. Запорожье атом электр станциясы Украина, АҚШ және Ресейдің қатысуымен бірлесіп пайдаланылуы мүмкін (тармақ әлі келісілуде).

15. Украина мен Ресей мектептер мен қоғамда төзімділік пен мәдени өзара түсіністікті арттыратын білім беру бағдарламаларын енгізеді.

16. Украина ЕО стандарттарына сай діни еркіндік пен ұлттық азшылық тілдерін қорғау нормаларын қабылдайды.

17. Территория мәселесі екі нұсқа бойынша қаралады:
    – әскерлер тұрған қазіргі шепті де-факто жанасу сызығы ретінде тану;
    – немесе Донбаста демилитаризацияланған еркін экономикалық аймақ құру.

18. Келісілген аумақтық шарттар болашақта күшпен өзгертілмейді.

19. Ресей Украинаға Днепр өзені мен Қара теңіз арқылы еркін сауда жүргізуге кедергі келтірмейді, Кинбурн түбегі демилитаризацияланады.

20. Келісімге қол қойылған сәттен бастап толық атысты тоқтату режимі енгізіледі, ал оның орындалуын Дональд Трамп төрағалық ететін Бейбітшілік кеңесі бақылайды.