Зеленский Путиннің Мәскеуге шақырғанына жауап берді

Украина президенті Владимир Зеленский Ресей басшысы Владимир Путиннің «егер кездесу өтсе, Мәскеуде өтуі мүмкін» деген сөзіне пікір білдірді.

«Менің ойымша, білесіздер ме, кездесудің болмағанын қаласаңдар – мені Мәскеуге шақырыңдар. Ресейдің кездесуді айтып жатқанының өзі жаман емес. Бірақ әзірге олардың соғысты аяқтағысы келіп тұрғанын көріп отырған жоқпыз», – деді Зеленский Парижде Франция президенті Эммануэль Макронмен бірлескен баспасөз мәслихатында.

Бұған дейін Путин Қытайға сапары кезінде Зеленскиймен кездесу Мәскеуде өтуі мүмкін екенін айтқан еді. Сонымен қатар ол мұндай кездесудің қажеттілігіне күмән келтіріп, украиналық әріптесінің легитимдігіне тағы да сұрақ қойған.

Ресей президенті бұл кездесуді ұйымдастыру туралы өтінішті АҚШ президенті Дональд Трамптан алғанын растады. БАҚ дерегінше, Трамп пен Путиннің әңгімесі Вашингтонда өткен саммитте болған, оған Украина президенті мен Еуропа көшбасшылары да қатысқан.