Зеленский Қазақстанда Путинмен кездесуге дайын екенін айтты

Украина президенті Владимир Зеленский АҚШ-қа сапары барысында Fox News арнасына сұхбат беріп, Ресей президенті Владимир Путинмен келіссөз жүргізуге дайын екенін мәлімдеді. Оның айтуынша, кездесу бейтарап аумақта өтуі мүмкін, соның ішінде Қазақстан да ықтимал орындардың бірі ретінде аталды.

«Трамп командасы да, менің командам да, еуропалықтар, соның ішінде Макрон және өзге де лидерлер, сондай-ақ Түркия президенті – бәріміз келіссөзді Түркия, Сауд Арабиясы, Қатарда, Еуропадағы бейтарап елдер – Австрия, Швейцарияда өткізуді ұсындық. Тіпті егер Қазақстанда болса, біз дайынбыз», – деді Зеленский.

Украина басшысы келіссөздер халықаралық әріптестердің қатысуымен ғана өтуі тиіс екенін ерекше атап өтті.

Айта кетейік, қыркүйек айында Ресей президенті Владимир Путин Зеленскийге Мәскеуде кездесу өткізуді ұсынған еді. Алайда Украина басшысы бұл нұсқаны «реалистік емес» деп қабылдамаған.