Заңгерлер қосылған құн салығы шегін төмендетуге қарсы петиция бастады

Қазақстандық заңгерлер Жангелді Сүлейменов пен Әнуарбек Сқақов үкіметтің қосылған құн салығы бойынша міндетті тіркеу шегін 15 млн теңгеге дейін төмендету ұсынысына қарсы петиция бастады.

Олардың айтуынша, бұл бастама шағын бизнеске ауыр соққы болып тиеді. Кәсіпкерлер салықтық жүктеменің артуына байланысты амалсыздан бизнесін қысқартуға немесе басқа жолдар іздеуге мәжбүр болады. Сондай-ақ тауарлар мен қызметтердің бағасы кемінде 20%-ға қымбаттауы мүмкін.

Бұдан бөлек, шағын кәсіпкерлер ҚҚС-ті қайтарып ала алмайтындықтан, қосымша шығындарға ұшырайды. Сонымен қатар тіркеу рәсімі күрделі және қымбатқа түсетіні айтылып жатыр.

Заңгерлер салық бақылауы күшейген жағдайда кәсіпкерлерге жиі тексерістер мен айыппұлдар салынатынынан да қауіптеніп отыр.

Петиция epetition.kz платформасына жүктеледі. Оны жариялау үшін кем дегенде 50 адамның электронды цифрлық қолтаңбамен қолдауы қажет.

Еске сала кетейік, 28 қаңтарда өткен Үкіметтің кеңейтілген отырысында Ұлттық экономика министрі Серік Жұманғарин ҚҚС бойынша тіркеу шегін 78,64 млн теңгеден 15 млн теңгеге дейін төмендетуді ұсынған еді.