Заңгер Тоқаевтан 2026 жылды қазақ тілі жылы деп жариялауды сұрады

Белгілі заңгер Мейірман Шекеев Қазақстан Президенті Қасым-Жомарт Тоқаевқа 2026 жылды «Қазақ тілі – мемлекеттік тіл жылы» деп жариялау жөнінде үндеу жасады. Ол бұл туралы Instagram парақшасында жариялаған бейнеүндеуінде айтты.

Заңгердің айтуынша, келер жылы қазақ тіліне мемлекеттік тіл мәртебесі берілгеніне 37 жыл толады. Алайда осы уақыт ішінде қазақ тілі мемлекеттік тіл тұғырына толық орныға алмай келеді.

Мейірман Шекеев сондай-ақ Қазақстан тәуелсіздік алғанына 34 жыл өтсе де, кейбір мемлекеттік салада, соның ішінде сот жүйесінде де қазақ тілінің қолданылу үлесі әлі күнге дейін 34 пайызға жетпейтінін атап өтті.

Оның сөзінше, Мемлекет басшысының ұсынысымен орыс тілін қолдау және дамытуға бағытталған халықаралық ұйым құрылып, 2023 жыл «орыс тілі жылы» деп жарияланған. Бұл бастамаларға бюджеттен қаржы да бөлінген.

Заңгер орыс тілінің дамуына қарсы емес екенін, алайда соның көлеңкесінде қазақ тілінің шет қалып отырғанын айтты. Осыған байланысты ол Қазақстан халқын бір тілдің аясында топтастыру мақсатында 2026 жылды «Қазақ тілі – мемлекеттік тіл жылы» деп жариялауды сұрады.

Сондай-ақ ол орыс тілінде сөйлеп, Қазақстан заңнамасын толық білмейтін азаматтарға мемлекеттік тілдің мәртебесін түсіндіру үшін бұл үндеуді әдейі жариялағанын жеткізді. Ал қазақ тілінің болашағына алаңдайтын азаматтарды үндеуді таратып, қолдау білдіруге шақырды.

«Халық сұраса, хан түйесін сояды. Келер 2026 жыл Қазақстанда “Мемлекеттік тіл жылы” болып жариялансын», – деп түйіндеді заңгер.