Заң алдында жауап беруге дайынмын: Серік Шәріп өз әрекеті үшін кешірім сұрады

Актер Серік Шәріп өзіне тұрмыстағы зорлық-зомбылық бойынша тағылған айыптан кейін мәлімдеме жасады. Ол Instagram парақшасында видеоүндеу жариялап, көпшіліктен кешірім сұрады.

— Менің атым — Серік Шәріп. Мен зорлық-зомбылыққа қарсымын. Өкінішке қарай, сіздер менің Әлия Бутееваны лифтіден дөрекі түрде сүйреп шығарған сәтімді көрдіңіздер. Бұл видеода мен ешкімнің алдында өзімді ақтағым келмейді. Мен ауыр қателік жасадым және заң алдында толық жауап беруге дайынмын, — деді ол.

Актёрдің айтуынша, ашуға беріліп, Әлияға шапалақ берген. Ол өз әрекетін мойындап, Әлия Бутеева мен оның отбасынан, сондай-ақ қоғамнан кешірім сұрады.

— Ашу үстінде адам не істеп қойғанын аңғармай қалады. Бірақ менің жағдайымды қайталамаңыздар. Қол көтермеңіздер, — деп ескертті Шәріп.

Еске салайық, бұған дейін әлеуметтік желіде актёрдің Әлия Бутееваны күштеп лифтіден шығарып жатқан бейнежазбасы тараған болатын. Алматы қаласы полиция департаменті бұл оқиғаға байланысты тексеру жүргізіп жатқанын хабарлады.

Salem Entertainment компаниясы Серік Шәріппен барлық шығармашылық байланысын үзетінін, оның қатысуымен түсірілген “Патруль: соңғы бұйрық” фильмінен оның барлық көріністерін алып тастайтынын мәлімдеді. Сонымен қатар жоспарланған жобаларға (оның ішінде “Meow” және “Qarga”) да актёр қатыспайды.