Яндекс.Еда, 2GIS: Қазақстандықтардың жеке дерегі желіге тарап кетті

Өткен аптада желіде қазақстандықтардың дерегі таралып кетті. Бұл туралы Кибер-шабуылдарды талдау және тергеу орталығы хабарлады.

Пайдаланушылардың бірі BreachForums хакерлер форумының бүкіл дерекқорын желіге салған. 2022 жылдан 2023 жылға дейін жұмыс істеген бұл форум зиянды бағдарламалар мен ұрланған деректермен сауда жасағанымен танымал.

Жалпы алғанда, BreachForums хакерлер форумында Қазақстаннан шамамен 15 хакер тіркелген.

2022 жылдың 29 қарашасына дейінгі барлық дерек тарап кеткен. Оның ішінде пайдаланушы идентификаторлары, хэштелген құпиясөздер, жеке хабарламалар, форум кредиттерін сатып алу үшін пайдаланылатын криптовалюта мекенжайлары және сайттағы барлық хабар бар.

Тарап кеткен деректер арасында:

• Сервистік стансаны басқарушылардың деректер базасы — Ресей және Қазақстан;
• Spark көлік-логистикалық компаниясының деректері;
• Шәкәрім атындағы университет студенттері мен талапкерлерінің деректер базасы;
• B2B 2 GIS Қазақстанның 2022 жылдың 24 маусымындағы барлық деректері;
• Қазақстан мен Ресейдің Yandex Food қосымшасы пайдаланушыларының деректері;
• Fonbet-тің қазақстандық және ресейлік пайдаланушыларының 2021 жылғы деректері бар.

«Кейбір мәліметтерге сәйкес, бұл дерек ресурстың бұрынғы әкімшісі Конор Брайан Фицпатридің дерекқорының сақтық көшірмесінен алынған. Сонымен қатар форумға қатысушылардың әртүрлі хабарламасы жарияланған. Солардың бірінде қазақстандық маңызды банкке шабуыл жасалғаны айтылған. Қазіргі уақытта құқық қорғау органдарында бұл деректер базасы бар», – деді TSARKA Group-тың негізін қалаушы Олжас Сатиев.