World Boxing – Ресей спортшыларын толық қайтарған 12-федерация

Геннадий Головкин басқаратын World Boxing Ресей боксшыларына қойылған шектеулерді алып тастап, олардың ұйым жарыстарына ұлттық туы мен әнұранымен қатысуына рұқсат берді. Шешімді ұйымның атқарушы кеңесі Глазгодағы отырысында қабылдады.

World Boxing мәлімдемесінде ресейлік спортшылар енді өзге ұлттық федерациялардың боксшыларымен бірдей тәртіппен жарысқа қатысатыны айтылған. Сонымен бірге ұйым Ресей делегацияларының жарыс кезіндегі тәртібі мен допингке қарсы талаптарды сақтауын қатаң қадағалайтынын хабарлады.

Бұған дейін Ресей мен Беларусь боксшылары World Boxing жарыстарына бейтарап мәртебемен қатысуы керек болған. Бұл тәртіп бойынша оларға ұлттық ту, әнұран және құрама киімін пайдалануға тыйым салынған еді.

Шешім Халықаралық олимпиада комитеті 7 шілдеде Ресей Олимпиада комитетінің шеттетілуін шартты түрде тоқтатқаннан кейін қабылданды. Осыдан соң халықаралық федерацияларға Ресей спортшыларына қатысты бұрынғы ұсынымдар күшін жойғаны хабарланған.

World Boxing Ресей спортшыларына ұлттық рәміздермен қатысуға мүмкіндік берген халықаралық федерациялар қатарын толықтырды. Бұған дейін мұндай шешімді ауыр атлетика, дзюдо, семсерлесу және өзге де спорт ұйымдары қабылдаған. World Boxing – осындай рұқсат берген 12-федерация.

Әлеуметтік желілерде бұл шешім Ресей спорт министрі Михаил Дегтярев пен Геннадий Головкиннің қаңтардағы кездесуінен кейін қабылданды деген пікір тарады. Алайда қолжетімді ресми мәліметтерде сол кездесуде Ресей боксшыларын ұлттық рәміздермен жарысқа жіберу мәселесі талқыланғаны көрсетілмеген. World Boxing шешімнің атқарушы кеңестегі дауыс беру арқылы қабылданғанын мәлімдеді.

Ресей бокс федерациясы World Boxing құрамына 2026 жылғы наурызда қабылданған. Ал сәуірде ресейлік боксшыларға тек бейтарап мәртебемен қатысу тәртібі бекітілген еді.