Wildberries-тегі шабуылдар қазақстандық сатушыларға 1 млрд теңгеден астам шығын келтірді

Wildberries-тегі шабуылдар салдарынан қазақстандық сатушыларға келген алдын ала шығын 1 млрд теңгеден асты. «Атамекен» Ұлттық кәсіпкерлер палатасының мәліметінше, төтенше жағдайдан Қазақстандағы 100-ден астам кәсіпкер зардап шеккен.

Қазір зардап шеккен сатушылардың толық тізімі мен нақты қаржылық шығын көлемі анықталып жатыр. Бұл жұмысқа өңірлік кәсіпкерлер палаталары, жергілікті атқарушы органдар және салалық қауымдастықтар тартылған.

«Атамекен» қазақстандық кәсіпкерлердің құқықтарын қорғау және өтемақы алу рәсімдерін жеделдету үшін мемлекетаралық байланыс тетіктерін пайдалануды ұсынды. Осыған байланысты Ұлттық палата Сауда және интеграция министрлігіне ресми сауал жолдаған.

Сонымен қатар уәкілетті органдар, «Атамекен», Wildberries басшылығы және зардап шеккен кәсіпкерлердің қатысуымен жұмыс тобын құру ұсынылды. Топ шығынды бағалау және сатушыларға құқықтық қолдау көрсету тәртібін әзірлеуге тиіс.