Wildberries қоймаларына жасалған шабуылдардың салдарынан сатушылар 1,6 триллион теңгеден астам шығынға батуы мүмкін

Wildberries маркетплейсінің қойма кешендеріне жасалған шабуылдар салдарынан ресейлік кәсіпкерлердің тартқан материалдық шығыны 1,27–1,65 триллион теңгені (215–280 миллиард рубль) құрауы мүмкін. Бұл туралы Forbes басылымына Data Insight сараптамалық агенттігінің жетекші сарапшысы хабарлады.

Сарапшы бұл есептеулерді 2024 жылы Санкт-Петербургтегі 112 мың шаршы метрді құрайтын қоймада болған өрттен кейінгі деректерге сүйене отырып жасаған. Ол кезде сатушыларға тауар қалдықтары үшін 206,5 миллиард теңгеге (35 миллиард рубльге) жуық өтемақы төленген болатын.

Агенттік өкілінің бағалауынша, тамыз айының басындағы жағдай бойынша зақымдалған қоймалардың жалпы аумағы 893 мыңнан 1,15 миллион шаршы метрге дейін жетеді. Бұл RWB тобына тиесілі логистикалық инфрақұрылымның (жалпы аумағы 5,2 млн шаршы метр) 17,2%-дан 22,2%-ға дейінгі бөлігін құрайды.

SellerDen компаниясының бас директоры Денис Веретенников екі апта бойы жалғасқан шабуылдардың салдарынан зардап шеккен кәсіпкерлердің саны жүздеген мыңға жетуі мүмкін екенін атап өтті. Жәбірленуші сатушылардың нақты саны әлі белгісіз.

Шілде айының екінші жартысынан бастап Wildberries нысандары ұшқышсыз аппараттардың нысанасына айналды. 3 тамызда Владимир облысындағы 18-ші қоймада өрт шықты. Украина тарапы бұл әрекеттерді өз елдерінің азаматтық инфрақұрылымына жасалған соққыларға қайтарылған жауап деп түсіндірді. Украина Президенті Владимир Зеленскийдің мәлімдеуінше, кейбір логистикалық орталықтар санкция салынған дрон бөлшектері мен навигациялық құралдарды тасымалдау үшін пайдаланылған.