Wildberries Қазақстанда қойма салуға ресми ұсыныс жасамады – Сауда министрлігі

Wildberries компаниясынан Қазақстанда қойма салу немесе жалға алу жөнінде ресми өтініш түскен жоқ. Бұл туралы Сауда және интеграция министрлігі компанияның елдегі қойма мүмкіндіктерін қарастырып жатқаны туралы ақпаратқа түсініктеме бере отырып хабарлады.

Министрлік тиісті ұсыныс түскен жағдайда оның Қазақстанның ұлттық мүддесі мен ел заңнамасының талаптары ескеріле отырып қаралатынын мәлімдеді.

Ведомство мұндай жобалар екі тарапқа да тиімді болуы керек екенін атап өтті. Соның ішінде қазақстандық кәсіпкерлерге қосымша мүмкіндік беру және ел экономикасына инвестиция тарту мәселесіне басымдық берілмек.

Министрлік тауарларды тасымалдау, сақтау және айналымға шығару үдерістері Қазақстан заңнамасымен және Еуразиялық экономикалық одақ құқығымен реттелетінін еске салды. Осыған байланысты жекелеген компанияларға ерекше талап немесе жеңілдік қарастырылмайды.