WBO Жәнібек Әлімханұлының бокстан бір жылға шеттетілгенін хабарлады

Дүниежүзілік бокс ұйымы (WBO) орта салмақтағы WBO және IBF нұсқалары бойынша әлем чемпионы, қазақстандық Жәнібек Әлімханұлының допинг сынамасынан ақау шығуына байланысты бір жылға дисквалификацияланғанын мәлімдеді. Бұл туралы Ring порталы хабарлады.

WBO Президенті Густаво Оливьеридің айтуынша, чемпиондық жекпе-жектер жөніндегі комитет Жәнібек Әлімханұлының барлық бокс және көрмелік кездесулерге қатысуын бір жылға тоқтату туралы бірауыздан шешім қабылдаған.

«Шеттету мерзімі 2025 жылдың 2 желтоқсанынан бастап есептеледі», - деді Оливьери.

Мәліметтерге сәйкес, боксшының 15 қарашада тапсырған сынамасынан тыйым салынған мельдоний заты табылған. Дисквалификацияның өткен жылдың соңынан бастап есептелуі спортшының тоғыз айдан кейін рингке қайта оралуына мүмкіндік береді.

Жәнібек Әлімханұлы (17–0, 12 КО) 6 желтоқсанда WBA чемпионы Эрисланди Ларамен титулдарды біріктіру жекпе-жегін өткізуі тиіс еді. Алайда  оң нәтижелі допинг сынамасы туралы ақпарат шыққан соң, ол жекпе-жектен шеттетілді. Боксшының өзі кез келген заңбұзушылықты жоққа шығарып отыр.

Мельдоний препараты 2016 жылдан бастап Дүниежүзілік антидопинг агенттігінің (WADA) тыйым салынған заттар тізіміне енген. Ол спортшының төзімділігін арттырып, физикалық жүктемеден кейін тез қалпына келуіне септігін тигізеді деп есептеледі.

WBO орта салмақтағы бәсекелестікті тоқтатпау мақсатында «уақытша» әлем чемпионы белбеуін сарапқа салуды ұйғарды. Бұл атақ үшін рейтингтің үздіктері Дензел Бентли мен Эндри Сааведра жұдырықтасатын болады.

Дисквалификация мерзімі біткен соң, Жәнібек Әлімханұлы ешқандай дайындық кездесусіз бірден осы «уақытша» чемпионмен жекпе-жекке шығуға міндеттелді. Егер отандасымыз бұл талаптан бас тартса, ұйым оған қатысты бұдан да қатаң санкциялар қолдануы мүмкін.