Вячеслав Ким Jusan Bank акцияларының 97,5%-ын сатып алмақ

Kaspi.kz директорлар кеңесінің төрағасы әрі акционері Вячеслав Ким Jusan Bank-тің 97,5% акциясын сатып алу туралы өтініш бергенін мәлімдеді. Бұл туралы Kaspi.kz баспасөз қызметі хабарлады.

"Мен Jusan Bank-тің 97,5% акциясын сатып алу үшін Қаржы нарығын реттеу және дамыту агенттігіне өтініш бердім. Қазіргі таңда өтініш агенттік қарауында. Олар өтінішті егжей-тегжейлі зерттегенен кейін шешім қабылдайды. Айта кетейін, бұл мәміленің Kaspi.kz компаниясына ешқандай қатысы жоқ", – деді Вячеслав Ким.

Айта кетейік, Jusan Bank 2023 жылы Қазақстан юрисдикциясына қайтарылған болатын. Бұған дейін банк бұрынғы президент Нұрсұлтан Назарбаевпен байланысты Pioneer Capital Invest арқылы шетелдік Jusan Technologies Ltd компаниясына берілген еді.

Бас прокуратураның мәліметінше, бұл шешім қоғамдық мүдделерге қауіп төндіріп, Назарбаев Университеті мен Назарбаев Зияткерлік мектептері секілді білім беру ұйымдарының қаржыландыру көздеріне кері әсер еткен. Осыған байланысты 2022 жылы Әділет министрлігі мен өзге де мемлекеттік органдар Jusan тобының активтерін елге қайтару бойынша жұмыс жүргізді.

Нәтижесінде банк Қазақстан үкіметінің бақылауына өтті, ал 2023 жылдың тамызында оның 100%-ға жуық акциясы бизнесмен Ғалымжан Есеновке тиесілі болды.