Вьетнамнан экстрадиция: Наркобизнеске бөлінген 2,5 млрд теңгені жымқырған күдікті Қазақстанға қайтарылды

Наркобизнеске қарсы күреске бөлінген 2,5 миллиард теңгені жымқырды деп айыпталған алаяқтық схеманың басты ұйымдастырушысы Вьетнамнан Қазақстанға экстрадицияланды. Бұл туралы Қаржылық мониторинг агенттігі (ҚМА) ресми хабарлады.

Ведомство мәліметінше, аталған қаражат 2023–2025 жылдарға арналған Наркоманияға және наркобизнеске қарсы күрес жөніндегі кешенді жоспар шеңберінде Әділет министрлігінің Сот сараптамасы орталығын материалдық-техникалық жарақтандыруға бөлінген. Жалпы бюджеті 10 миллиард теңгеден асатын бұл жобадан ірі көлемде қаражат қолды болған.

Күдікті Сот сараптамасы орталығының бұрынғы директоры Р. Сатыбалдеевпен, Мемлекеттік сатып алу департаментінің басшысы Д. Искендеровамен және жеке компаниялардың жетекшісі А. Шинтемировамен ымыраласып, қылмыстық схема құрған. Олар жеткізілетін құрал-жабдықтардың бағасын үш есеге дейін өсіріп, жалған коммерциялық ұсыныстар арқылы 2,5 миллиард теңгені қалтаға басқан.

Бұған дейін сот шешімімен Сатыбалдеев, Искендерова және Шинтемирова кінәлі деп танылып, мүлкі тәркіленумен қатар 3 жылдан 8 жылға дейінгі мерзімге бас бостандығынан айырылған еді.

Ал қылмыстық топтың басты ұйымдастырушысы бой тасалап, 2025 жылдың наурызында оған сырттай қамауға алу бұлтартпау шарасы белгіленіп, халықаралық іздеу жарияланған. Ағымдағы жылдың басында ол Вьетнам аумағында ұсталды.

ҚМА, Интерпол және ҚР Сыртқы істер министрлігінің бірлескен нәтижелі жұмысының арқасында күдікті елге қайтарылды. Қазіргі уақытта оған қатысты қылмыстық іс сот қарауына жолданды.