Утиль алымнан түскен қаржы қайда кетіп жатыр?

Бұл туралы "Жасыл Даму" АҚ басқарма төрағасының орынбасары Шынасыл Ерназар утилизациялық алымға қарсы петиция бойынша қоғамдық тыңдауда айтып берді.

Оның айтуынша, 2022-2023 жылдары 180 млрд теңге жеңілдетілген автонесиелеу, ауыл шаруашылығы техникасы мен автобустар лизингін қаржыландыруға бөлінген. 

200 млрд теңге 2024-2027 жылдары қоқыс жинау, сұрыптау және қайта өңдеу жобаларына; өрт сөндіру көлігі мен орман шаруашылығына харвестерлер алуға бөлініп отыр.

2024 жылы Төтенше жағдай министрлігі, Су ресурстары министрлігі, Экология министрліктеріне арнайы техника, сондай-ақ жаңа автобустар алу үшін 90 млрд теңге қарастырылған.

Шынасыл Ерназар "Өнеркәсіпті дамыту қоры" АҚ арқылы қайтарымды негізде бөлінуі жоспарланып отырған 470 миллиард теңгеге тоқталды.

Оның 185 млрды зауыттарға жұмсалмақ. Бұл қаржы Қазақстан бойынша жылына жалпы қуаты 3 миллион тонна қалдықтарды сұрыптайтын 21 желі, қайта өңдеу бойынша 45 зауыт салуға, 223 арнайы техника сатып алуға бөлінген.

100 млрд теңгеге 13 347 отбасы жеңілдетілген автонесиелеу арқылы жаңа көлік сатып алған.

50 млрд теңгеге 1722 дана ауыл шаруашылық техникасы сатып алынған.

Тағы 50 млрд теңге Төтенше жағдайлар министрлігі мен Су ресурстары және ирригация министрлігіне су тасқынына қарсы шаралар үшін арнайы техника алуға бөлінді.

45 млрд теңгеге 1100 жаңа автобус сатып алу жоспарланған. 

Орман өрттерін жедел сөндіру үшін жаңа машиналар алуға 40 млрд теңге бөлінеді.