"Үтік басып күйдірген": Шымкентте балаларын аяусыз азаптаған ана сотталды

Шымкентте балаларын қатыгездікпен азаптады деп айыпталған әйел 5 жыл 3 айға бас бостандығынан айырылды. Үкімді қалалық сот шығарды.

Сот материалдарына сәйкес, әйел 8 жастағы ұлының темекі шеккенін білгеннен кейін оны ұрып-соғып, ауыз тұсын қызған шанышқымен күйдірген. Бірнеше күннен соң балаларын ақша ұрлады деп күдіктеніп, ұлының бетін, ал 11 жастағы қызының ішін ыстық үтікпен күйдірген.

Бұдан бөлек, ол балаларын күштеп шашын тақырлап қырып, суық суға секіруге мәжбүрлеген және тұншықтыруға әрекет жасаған. Тергеу барысында кәмелетке толмағандардың денсаулығына ауыр зиян келтірілгені және психологиялық зардап шеккені анықталған.

Прокурор айыпталушыға 4 жыл 8 ай жаза сұраған. Жәбірленуші тарап кешірім білдіргенімен, сот бұл жазаны жеткіліксіз деп танып, қатаңырақ үкім шығарды.

Otyrar басылымының жазуынша, сотталушы өз кінәсімен келіспейтінін мәлімдеді. Оның айтуынша, оқиға кезінде өзін ұстай алмаған. Сондай-ақ ол ұзақ уақыт бойы жақындары тарапынан қысым көргенін айтқан.

Қазіргі уақытта балалар мемлекеттік қорғауға алынған. Үкім заңды күшіне енген жоқ, тараптар апелляциялық шағым түсіруді жоспарлап отыр.