Усть-Лугадағы төбелестің соңы не болды? СІМ шұғыл мәлімдеме жасады

Ресейдегі ірі құрылыс нысанында жүздеген адам қатысқан қақтығыс орын алды. Вахталық қалашықтағы жағдай ушығып, соңы тұтқындауға ұласты, деп хабарлайды Baq.kz.

Ленинград облысындағы Усть-Луга кентінде болған атышулы оқиғаның жай-жапсары белгілі болды. "Велестрой" компаниясының нысанында бұрқ ете түскен жанжалға бірнеше жүз адам қатысқан. Қазақстанның Сыртқы істер министрлігі отандастарымыздың тағдырына қатысты соңғы деректерді жариялады.

Төбелестен кейін бірден 30-дан астам адам ұсталған. Алғашқы тергеу амалдарынан кейін көбі босатылғанымен, бірнеше қазақстандыққа қатысты сот шешімі шықты:

• Бір топ азамат 10 тәулікке әкімшілік қамауға алынды.

• Тағы үш отандасымыз әлі де тергеу изоляторында қалып, қылмыстық іс бойынша жауап беріп жатыр.

Дипломаттардың хабарлауынша, қақтығыс кезінде қазақстандықтар арасында жарақат алғандар жоқ, медициналық көмек ешкімге қажет болмаған. Қазіргі уақытта консулдар оқиға орнында жұмыс істеп, құқықтық көмек көрсетуде.

Ресми нұсқа бойынша, 26 наурызда болған төбелес тұрмыстық сипатта болған. Мамандар бұл жерде ұлтаралық араздық жоқ екенін айтып сендіруде. Қазір вахталық қалашықта күзет күшейтіліп, жұмыс беруші мен құқық қорғау органдары арасында арнайы жиын өтті. Қазіргі таңда жағдай тұрақталған.