Үш жол апатынан 25 адам қаза тапты: ІІМ жолдарда ауқымды тексеріс жүргізеді

Қазақстанда үш ірі жол апатынан 25 адам қаза тапқаннан кейін Ішкі істер министрлігі жолдарда ауқымды тексерістерді бастады. Бұл туралы ведомствоның баспасөз қызметі хабарлады.

– 11 қыркүйекте Маңғыстау облысында шағын автобус аударылып, 10 жолаушы қаза тапты.
– 14 қыркүйекте Жетісу облысында қарсы жолаққа шыққан көлік үш автокөліктің соқтығысуына себеп болды. Тағы 10 адам қаза болды.
– Қарағанды облысында болған апатта 5 адам көз жұмды.

ІІМ Әкімшілік полиция комитеті төрағасының орынбасары Ғалым Сарғұлов қаза тапқандардың отбасына көңіл айтып, әрбір факті бойынша тергеу басталғанын жеткізді.

Оның айтуынша, қайғылы оқиғалардың басты себептері – жылдамдықты асыру, қарсы жолаққа шығу, қауіпті маневр жасау және қауіпсіздік белдігін тақпау.

"Ауқымды тексерістер, рейдтер, қалааралық бағыттар мен жеке тасымалдарға мониторинг жүргізіледі. Көліктің техникалық жағдайына және жүргізушілердің жауапкершілігіне ерекше назар аударылады. Қауіпсіздік – әр жүргізушінің жеке тәртібі. Жолдағы бір қателік орны толмас қайғыға әкелуі мүмкін", – деді Ғалым Сарғұлов.