Үш жасар бүлдіршін Тоқаевтан алғыс хат алды

10 сәуірде Атырау облысының әкімі Серік Шәпкенов әлеуметтік желіде танымал болған үш жасар Дінмұхаммед Жұмажан мен оның ата-анасымен кездесті. Бұл туралы облыс әкімінің баспасөз қызметі хабарлады.

Дінмұхаммедтің Ораза айт мерекесінен кейін аумақты тазалап жүрген видеосы әлеуметтік желіде кең таралып, көпшіліктің жүрегінен орын алған еді. Кішкентай баланың әрекеті қоғамда үлкен жылы пікір тудырды.

Облыс әкімі Дінмұхаммедтің тәрбиесі мен тазалыққа деген жауапкершілігіне ризашылығын білдіріп, Президент Қасым-Жомарт Тоқаевтың атынан жолданған алғыс хатын ҚР Президенті Әкімшілігінің жетекшісі Айбек Дәдебайдың қолынан табыстады.

«Кейде көп сөздің орнына бір ғана істің өзі жетіп жатады. Дінмұхаммед кішкентай ғана ойын баласы болса да, оның әрекеті көпке ой салды. Бұл — нағыз тәрбиенің және отансүйгіштіктің үлгісі. Мемлекет басшысының “Таза Қазақстан” бастамасы — уақытша емес, өмір салтына айналуы тиіс. Кішкентай Дінмұхаммедтің жасағаны — тазалықты әркім өзінен бастауы керек деген үндеу», – деді С. Шәпкенов.

Бүлдіршіннің әкесі Ержан Хайрошев ұлының әрекеті кездейсоқ түсірілгенін айтты. Оның сөзінше, бір тұрғын видео түсіріп, оны желіге жүктеген.

«Біз өз ықшамауданымызда Ораза айт мерекесін кең көлемде атап өттік. Ұлымның әрекеті бүкіл елге үлгі болады деп еш ойламадық. Оның тілі кеш шыққан еді, кейін балабақшаға бердік. Сол жақтан да үйренгені бар шығар. Өзіміз де тазалыққа мән береміз, сенбіліктерге қатысып тұрамыз. Ұлымның елінің патриоты болғанын қалаймын», – деді әкесі.