«Үш пәтермен үнсіздігімді сатып алмақ болды» – Сәкен Мамаштың бұрынғы жұбайы сот үкімі туралы

Сәкен Мамаштың бұрынғы жары Карина Госман экс-дипломаттың азаптау әрекеттері үшін 6 жылға сотталуына қатысты пікір білдірді. Оның айтуынша, Мамаш кінәсін мойындамаған және тергеу барысында қысым көрсетіп, манипуляция жасаған. Бұл туралы informburo.kz хабарлады.

"Ол жылдар бойы және бүкіл процесте манипуляция жасап, қысым көрсетті. Бұл – кек алу емес, бұл – әділдік. Мен оның бір күні шын мәнінде түсініп, өкініш білдіретініне сенгім келеді. Себебі мен ескерткенде, ол тек күліп жүретін", – деді Карина.

Ол адвокаттарына, дағдарыс орталығына, БАҚ өкілдеріне және барша қазақстандыққа қолдау білдіргені үшін алғыс айтты. Сондай-ақ тұрмыста зорлық-зомбылыққа ұшыраған әйелдерге үндеу тастады.

"Ешқашан зорлыққа төзбеңіздер. Егер сізді жақсы көрсе, онда ұрмайды. Қашыңыздар, айқайлаңыздар, көмек сұраңыздар. Шыға алмайтын жағдай болмайды. Бізде көмекке дайын дағдарыс орталықтары мен жанашыр жандар бар. Әділдік орнайды. Ол менің үнсіздігімді сатып алмақ болып, үш пәтер ұсынды. Бірақ мен оған бір-ақ нәрсе айттым: ешбір шаршы метрге…" – деді ол, ойын аяқтамастан.

Карина Мамаштың алимент төлемейтінін және балалар тұруы тиіс баспана бермегенін де атап өтті. Ол бастапқыда ажырасу үдерісін балалар үшін бейбіт түрде шешуге тырысқанын, бірақ Мамаш тек өзін ғана ойлағанын айтты.

"Егер 47 жастағы адамда сана болмаса, мен ол үшін жауап беруге міндетті емеспін", – деді ол сөз соңында.

Еске салайық, Сәкен Мамашты Астана қаласының қылмыстық істер жөніндегі соты Қылмыстық кодекстің 110-бабы 2-бөлігі, 1-тармағы ("Материалдық тұрғыдан тәуелді адамға қатысты азаптау") бойынша кінәлі деп танып, 6 жылға бас бостандығынан айырды. Сонымен қатар оны дипломатиялық рангінен айырды.