Үш баланың әкесі алиментті 21 мың теңгеге дейін азайтуды сұраған

Алматы тұрғыны кәмелетке толмаған үш баласына төленетін алимент көлемін азайтуға әрекет жасаған. Бұл туралы соттың баспасөз қызметі хабарлады.

Іс материалдарына сәйкес, ер адам 2009, 2012 және 2015 жылы туған балаларына төленетін алимент мөлшерін қысқартуды сұрап сотқа жүгінген. Ол өзінің материалдық жағдайының нашарлағанын алға тартып, әр балаға төленетін төлем көлемін 5 айлық есептік көрсеткішке (21 625 теңге) дейін төмендетуді талап еткен. Талапкер жеке кәсіпкерде жұмыс істейтінін және ай сайынғы табысы 100 мың теңгені құрайтынын мәлімдеген болатын.  Алайда сот барысында ер адамның бұл мәліметтерді растайтын құжаттарды ұсына алмағаны анықталды. Сонымен қатар салық есептілігі мен іс материалдары оның көрсетілген жеке кәсіпкерде жұмыс істемейтінін және балаларын асырауға жеткілікті табысы бар екенін көрсетті.

Айта кетейік, 2016 жылы сот шешімімен азаматқа әр балаға 20 АЕК көлемінде, яғни 86 500 теңгеден алимент төлеу міндеттелген болатын. Кейін бірінші және апелляциялық сатыдағы соттар алимент мөлшерін екі есеге қысқартып, әр балаға 10 АЕК немесе 43 250 теңге төлеу туралы шешім шығарған. Алайда балалардың анасы бұл шешіммен келіспей, кассациялық сотқа жүгінді.

Кассациялық сот істі қайта қарап, талапкердің қаржылық жағдайының нашарлағаны дәлелденбегенін атап өтті. Сондай-ақ ер адамның өзіне тиесілі автокөлікті әпкесінің атына рәсімдегенімен, оны іс жүзінде өзі пайдаланып жүргені анықталды. Сот мұны мүлікті жасыру және алимент бойынша міндеттемелерден жалтару әрекеті ретінде бағалады. Нәтижесінде кассациялық алқа төменгі сот сатыларының шешімдерінің күшін жойып, алимент мөлшерін азайту туралы талапты қанағаттандырудан бас тартты.

Еске салсақ, елімізде 2024–2025 жылдары алимент төлеуден жалтарудың 11,5 мың фактісі тіркелген. Құзырлы органдардың мәліметінше, осы кезеңде жасырылған табыстың жалпы көлемі 20 миллиард теңгеден асқан.