Ұлытауда жылқылардың қырылуына кім жауап береді? Министр жауап берді

Ұлытау облысында қыста 360 бас жылқы қырылып қалған. Дегенмен бұл соңғы дерек емес, олардың саны бұдан да көп болуы мүмкін. Ауыл шаруашылығы министрі Айдарбек Сапаров малдың қырылуына кімдер жауапты екенін айтты.

Министрдің айтуынша, жылқының қырылуына ауа райының қолайсыздығы себеп болған. Дегенмен адамдар да жауап береді.

“Ең алдымен, күнде мал азығын дайындау жұмысын жүргізген кезде барлық облыс жем-шөптің 100 пайыз дайындалғаны туралы есеп берді. Бұл үшін аудандар мен ауылдық округтердің әкімдері жауап береді. Мұнан бөлек, Ұлытау ауданында жем-шөп дайындауға 1,4 млрд теңге субсидия бөлінді», – деді АШМ Үкімет отырысынан кейінгі брифингте.

Сапаров  тек әкімдіктер ғана емес, сонымен бірге малдың иелері де жауап беретінін айтып өтті. 

“Олар малды бағуға, жем-шөбін дайындауға жауап беруі тиіс. Жем-шөп дайындауға қатысты проблема болған жағдайда ауылдық немесе аудандық әкімдіктерге жүгінуі тиіс еді. Олар шешім қабылдауы тиіс болатын. Барлығы да жем-шөп 100 пайыз дайын деп есеп берді. Егер облыс бұл мәселені шеше алмағанда, көрші өңірлерден жеткізер едік”, – деп толықтырды ол.

Оның айтуынша, өлген 360 бас жылқының иесі табылмай жатыр. Ауыл шаруашылығы жануарларын біріздендіру базасында қырылған жылқылар тіркелмеген.  Қазіргі уақытта қырылған жылқыларды және иелерін анықтау жұмыстары жалғасып жатыр.