Ұлытауда 16 млн теңгеге бәс тіккен әкімдік қызметкері жұмыстан босатылды

Ұлытау облысында Сәтбаев қалалық әкімдігінде бас маман болып жұмыс істеген мемлекеттік қызметкер құмар ойындарға әуестігі үшін лауазымынан айырылды. Бұл туралы өңірлік прокуратура хабарлады.

Прокуратураның мәліметінше, екі танымал букмекерлік компаниядан алынған ақпарат негізінде аталған қызметкердің жалпы сомасы 16 миллион теңгеге бәс тіккені анықталған.

– «Сыбайлас жемқорлыққа қарсы іс-қимыл туралы» заңға сәйкес, мемлекеттік қызметшілерге телекоммуникациялық желілер мен интернет-ресурстар арқылы өткізілетін құмар ойындарына және бәс тігуге қатысуға тыйым салынған. Жүргізілген талдау нәтижесінде бас маман бұл талапты жүйелі түрде бұзып келгені белгілі болды, – делінген прокуратура хабарламасында.

Бақылаушы орган бұл заңбұзушылыққа байланысты шенеуніктің тікелей басшылығына қадағалау актісін енгізіп, нәтижесінде маман қызметінен босатылған.