Ұлттық құрылтайдың кезекті отырысы 20 қаңтарда Қызылордада өтеді

Мемлекет басшысы Қасым-Жомарт Тоқаев Қызылорда қаласында өтетін Ұлттық құрылтайдың бесінші отырысына дайындық мәселесін қарады. Жиынды өткізу күні 20 қаңтарға белгіленді.

Бұл мәселе Президенттің Мемлекеттік кеңесші Ерлан Қарин және Президенттің құқықтық мәселелер жөніндегі көмекшісі Ержан Жиенбаевпен өткізген кезекті жұмыс кеңесі барысында талқыланды. Кездесу барысында конституциялық және парламенттік реформаларға қатысты атқарылып жатқан жұмыстар жөнінде баяндалды.

Ерлан Қарин Мемлекет басшысына Жұмыс тобының 9 қаңтарда өткен отырысында болашақ бір палаталы Парламенттің мәртебесі, өкілеттіктері мен функцияларын айқындауға қатысты тәсілдер әзірленгенін жеткізді. Сондай-ақ жаңа Парламенттің биліктің өзге тармақтарымен өзара іс-қимыл тетіктері қарастырылып жатқанын айтты. Келесі отырыс 15 қаңтарға жоспарланған, онда басты мемлекеттік институттардың қызметін қамтамасыз ету мәселелері талқыланбақ.

Ал Ержан Жиенбаев Президентті конституциялық реформаға байланысты Жұмыс тобы мүшелері мен қоғам тарапынан келіп түскен жаңа ұсыныстармен таныстырды.

Мемлекет басшысы барлық пікір мен бастаманы мұқият ескеру қажеттігін атап өтіп, конституциялық реформа бойынша түпкілікті шешімді ел азаматтары жалпыұлттық референдум арқылы қабылдайтынын мәлімдеді.

Сонымен қатар Президент Ұлттық құрылтайдың алдағы отырысын жоғары деңгейде ұйымдастыруды тапсырды және жиынға тыңғылықты дайындалудың маңызын атап өтті.