Ұлттық құрылтайда кәсіпкерлікті дамытуға кедергі келтіретін мәселелер айтылды

Қызылорда қаласында өтіп жатқан Ұлттық құрылтайдың секция отырысында Парламент Мәжілісінің депутаты Нұртай Сабильянов елде кәсіпкерліктің дамуына тосқауыл болып отырған негізгі факторларды атады. Бұл жөнінде Kazinform хабарлады.

Депутаттың айтуынша, басты мәселелердің бірі – шағын және орта бизнеске берілетін несиелердің пайыздық мөлшерлемесінің жоғары болуы. Оның пікірінше, кәсіпкерлерге ұсынылатын несиелердің үстемесі 8 пайыздан аспауы тиіс.

«Қазіргі таңда екінші деңгейлі банктер несиені 20–25 пайызбен беріп отыр. Мұндай жағдайда кәсіпкерлікті дамыту мүмкін емес. Егер бұл мәселе шешілсе, кәсіп ашуға ниетті азаматтарға қолайлы жағдай қалыптасар еді», – деді ол.

Сондай-ақ Нұртай Сабильянов биыл күшіне енген Салық кодексін қайта қарау қажеттігін атап өтті. Оның сөзінше, жеке кәсіпкерлер жеңілдетілген декларация режимінде жұмыс істегенімен, заңды тұлғалар олардың қызметін пайдаланғанда негізгі шығын ауыртпалығы кәсіпкердің өзіне түсіп отыр. Осыған байланысты депутат кодекске өзгерістер мен толықтырулар енгізуге дайын екенін жеткізді.

Мәжіліс депутаты ауыл шаруашылығын қолдауға бағытталған «Ауыл аманаты» бағдарламасына да тоқталды. Бағдарлама аясында 5–7 жыл мерзімге 2,5 пайыздық жеңілдетілген несие берілетінін айта отырып, қаржыландыру көлемін арттыру және кепіл мәселесін қайта қарау қажет екенін атап өтті.

«Ауылдық жерлердегі тұрғын үйлердің нарықтық құны төмен, көп жағдайда кепілге жарамайды. Сондықтан қаражат алу тетіктерін жеңілдету – кезек күттірмейтін мәселе», – деді Нұртай Сабильянов.

Депутаттың айтуынша, аталған түйткілдер шешімін тапқан жағдайда елдегі кәсіпкерлік белсенділік артып, ауыл экономикасын дамытуға серпін береді.