Ұлттық қордан қайтадан миллиардтаған қаржы алынбақ

Қазақстан үкіметі 2027 жылдан бастап Ұлттық қордан нысаналы трансферт алуды қайта жоспарлап отыр. 2027 жылы қордан 2 трлн теңге, ал 2028 және 2029 жылдары 1,5 трлн теңгеден алу көзделген. Үш жылда нысаналы трансферттің жалпы көлемі 5 трлн теңге болады.

Бұл қаражат аса маңызды нысандар мен жалпыұлттық маңызы бар жобаларды қаржыландыруға жұмсалмақ. Мұндай жоспар 2027–2029 жылдарға арналған әлеуметтік-экономикалық даму болжамы мен республикалық бюджет жобасына енгізілген. Үкімет құжаттарды 25 тамыздағы отырысында қарап, Құрылтайға жолдады.

Ұлттық экономика министрі Серік Жұманғариннің айтуынша, бұдан бөлек Ұлттық қордан кепілдендірілген трансферт алу жалғасады. Оның көлемі 2027 және 2028 жылдары 2,43 трлн теңгеден, 2029 жылы 2 трлн теңге болады.

Осылайша, кепілдендірілген және нысаналы трансферттерді қоса есептегенде, 2027 жылы Ұлттық қордан бюджетке 4,43 трлн теңге, 2028 жылы 3,93 трлн теңге, 2029 жылы 3,5 трлн теңге аудару жоспарланып отыр.

Үкімет бұған дейін 2026 жылдан бастап үш жыл бойы Ұлттық қордан нысаналы трансферт алмауды жоспарлаған еді. Алайда жаңа бюджет жобасында бұл ұстаным өзгерді.

23 тамызда Президент Қасым-Жомарт Тоқаев Қазақстанда, әсіресе әлеуметтік нысандар құрылысын кеңейту қажет екенін айтып, осы мақсатқа Ұлттық қордың қаражатын пайдалануға дайын екенін мәлімдеген.

Үкімет болжамынша, ел экономикасы 2027 жылы 5,3 пайыз, 2028 жылы 5,5 пайыз, 2029 жылы 5,4 пайыз өседі. Республикалық бюджет шығысы тиісінше 30,2 трлн, 29,4 трлн және 29,6 трлн теңге болады.