Ұлттық қордағы 370 долларды қалай көбейтуге болады?

Қазақстанда 18 жасқа толған азаматтар «Ұлттық қор – балаларға» бағдарламасы аясында жиналған қаражатты бірден пайдалана алады. Бұл туралы Отбасы банк баспасөз қызметі хабарлады.

Банктің мәліметінше, бағдарламаның үш жылында әрбір қатысушының шотында инвестициялық табысты қоса есептегенде 370,56 доллар жиналған. Бұл қаражатты екі бағытта жұмсауға болады: тұрғын үй жағдайын жақсарту немесе білім ақысын төлеу. Өтінімдер Отбасы банктің онлайн платформасы арқылы қабылданады.

Отбасы банк өкілдері көптеген жас қазақстандық әлі күнге дейін бұл қаражатты пайдаланбағанын атап өтті. Қазір ол қаражат Бірыңғай жинақтаушы зейнетақы қоры шоттарында сақтаулы. Алайда оған пайыз есептелмейді. Егер 10 жыл ішінде қолданылмаса, қаражат автоматты түрде азаматтың зейнетақы шотына аударылады.

Білім беру бағыты бойынша жастар көбіне Қазақстандағы оқу ақысын төлеуге, Aqyl білім депозитін толықтыруға немесе оқу несиесінің бір бөлігін өтеуге жұмсап жатыр. Ал оқу ақысын төлеу қажеттілігі болмаса, Ұлттық қордан түскен қаражатты Отбасы банктегі депозитке аударуға мүмкіндік бар. Бұл жағдайда жинақ қосымша табыс әкеледі.

Банктің түсіндіруінше, депозитке салынған қаражатқа банктің 2% сыйақысы және мемлекет тарапынан 20% премия (200 АЕК-ке дейін) есептеледі. Нәтижесінде жылдық тиімді сыйақы мөлшерлемесі 14%-ға дейін жетуі мүмкін. Мұндай депозит кейін төмен пайызбен (жылына 3,5–8,5%) баспана алуға жол ашады.

Қазіргі таңда 18 жасқа толған қазақстандықтар осы мүмкіндікті жиі пайдаланып, Ұлттық қордан түскен қаражатты Отбасы банктегі салымдарға бағыттауда. Банк 112 818 өтінімді өңдегенін хабарлады. Сонымен қатар бұл қаражатты ипотека кезінде бастапқы жарнаға қосуға немесе баспананы толық төлеу үшін де қолдануға болады.

Ұлттық қордан қаражаттың түскен-түспегенін eGov mobile қосымшасынан, кейбір екінші деңгейлі банктердің қосымшаларынан және БЖЗҚ ресми сайтынан тексеруге болады.