«Ұлттық қор – балаларға»: былтырдан бері қазақстандықтарға 15 млн доллар аударылды

2024 жылғы ақпаннан бастап «Ұлттық қор – балаларға» бағдарламасы аясында қазақстандықтарға жалпы сомасы 15 миллион АҚШ доллары аударылды. Бұл туралы Бірыңғай жинақтаушы зейнетақы қорының (БЖЗҚ) баспасөз қызметі хабарлады.

117 мыңнан астам өтініш қабылданып, қаржы екі негізгі бағыт бойынша игерілді:

– $9,2 млн – тұрғын үй жағдайын жақсартуға берілген. Оның ішінде $9 млн-нан астамы жинақ депозиттерін толықтыру арқылы тұрғын үй сатып алуға бағытталған (69 756 өтініш).

– $5,66 млн – білім алуға төлеу мақсатында игерілген.

Жинақталған қаражатты иесі толық көлемде немесе ішінара пайдалана алады. Қалған сома мақсатты жинақ шотында сақталады.

«Ұлттық қор – балаларға» бағдарламасы бойынша 2006 жылдан кейін туған қазақстандық балаларға Ұлттық қордың инвестициялық табысының 50%-ы жыл сайын теңдей бөлініп отырады.

▪️ 2023 жыл үшін балалардың шотына $100,52;
▪️ 2024 жыл үшін – $129,38 аударылды.
Ал 2023 жылы алғаш рет қаржы түскен балаларға (2006 жылы туғандардан басқасына) биыл $3,04 көлемінде инвестициялық табыс есептелген.