$ 509.63 € 592.34 ₽ 6.54

Ұлттық компаниялар игерілмеген қаражатты бюджетке қайтаруға міндеттеледі

Абдрахманов Мағжан
03 шілде 2025, 10:49
Ұлттық компаниялар игерілмеген қаражатты бюджетке қайтаруға міндеттеледі Сурет авторы: gov.kz

Қазақстанда квазимемлекеттік сектор субъектілеріне жарғылық капиталды* қалыптастыруға немесе ұлғайтуға бөлінген, бірақ қаржы жылының соңына дейін пайдаланылмаған бюджет қаражатын міндетті түрде мемлекетке қайтару тәртібі енгізілді. Бұл туралы Жоғары аудиторлық палатаның баспасөз қызметі хабарлады.

Мұндай механизм жаңа Бюджет кодексінде қарастырылған. Аталған құжатқа Президент 2025 жылғы 15 наурызда қол қойған. Қаражатты қайтару тәртібін Ұлттық экономика және Қаржы министрліктері Жоғары аудиторлық палатаның тапсырмасымен әзірлеген.

«Бұл қадам бюджеттік қаражатты тиімді және ашық жұмсауға бағытталған. Бұрын ұлттық компаниялардың есепшотында «қатып» қалатын игерілмеген қаржы енді бюджетке қайтарылып, стратегиялық инвестициялық жобалар секілді басым бағыттарға қайта бағытталады», – делінген палата хабарламасында.

Жоғары аудиторлық палата бұл тәсіл бюджет қаражатын мақсатсыз немесе тиімсіз жұмсау қаупін төмендетіп, ашықтық пен есептілікті күшейтетінін атап өтті. Енді квазимемлекеттік ұйымдар қаржыны жоспарлау мен жұмсауға жауапкершілікпен қарауға мәжбүр, өйткені жыл соңына дейін игерілмеген сома міндетті түрде қайтарылуы тиіс.

*Жарғылық капитал – компанияны құру кезінде құрылтайшылар (немесе мемлекет) салып беретін бастапқы қаржы. Ол компанияның заңды түрде жұмыс істеуіне, мүліктер сатып алуына және қызметін бастауына қажет.

#Ұлттық компаниялар #Квазимемлекеттік сектор #Мемлекет бюджеті

Соңғы жаңалықтар