Ұлттық банк валюта нарығына $125,6 млн шығарып, теңгені тұрақтандыруға тырысты

Қазақстан Ұлттық банкі 30 шілде күні шұғыл валюталық интервенция жүргізіп, нарыққа 125,6 млн АҚШ долларын шығарды. Бұл туралы қаржы реттеушісі 1 тамызда хабарлады. Интервенция «валюта нарығындағы өтімділіктің өте төмен деңгейі мен күшейген алыпсатарлық қысым белгілері» аясында жасалған.

"Интервенциялар алыпсатарлық белсенділікті төмендетіп, нарықтағы қажетті өтімділікті қамтамасыз етуге мүмкіндік берді", – делінген Ұлттық банктің хабарламасында.

Теңге шілдеде 4%-ға әлсіреді

Ай қорытындысы бойынша теңгенің долларға шаққандағы бағамы 4%-ға арзандап, 540,72 теңгеге жетті. Сауда көлемі артып, Қазақстан қор биржасындағы күндік орташа сауда $235 млн-нан $260 млн-ға дейін өсті. Жалпы бір айдағы сауда көлемі – $5,7 млрд.

Ұлттық қордан 700 млн доллар сатылды

Шілдеде республикалық бюджетке трансферттер мен Талдықорған – Үшарал магистральды газ құбыры жобасын қаржыландыру үшін Ұлттық қордан $700 млн валюта сатылған. Бұл – нарықтағы жалпы сауда көлемінің 12%-ын немесе күн сайын орта есеппен $32 млн-ды құрайды.

Тамыз айында үкіметтің алдын ала болжамдарына сәйкес, республикалық бюджетке трансферттер бөлу үшін Ұлттық қордан тағы $400–500 млн аралығында валюта сатылуы мүмкін.

Квазимемлекеттік сектор $450 млн сатты

Шілдеде квазимемлекеттік сектор өкілдері шетел валютасынан түскен түсімнің бір бөлігін сату нормасына сәйкес $450 млн көлемінде валюта өткізген.

БЖЗҚ валюта сатып алуды уақытша тоқтатты

Ұлттық банк сонымен қатар шілде айында Бірыңғай жинақтаушы зейнетақы қорының валюта үлесін 40%-дық деңгейде ұстап тұру үшін $35 млн (немесе сауданың 0,6%-ы) көлемінде валюта сатып алды. Алайда қазіргі бағам жағдайында БЖЗҚ-ның валюта үлесі 40%-дан асып кеткендіктен, тамызда валюта сатып алу жоспарланбайды.