Ұлттық банк доллар бағамына қатысты қазақстандықтарға үндеу жасады

28 қарашада теңге бағамы 1 АҚШ долларына 500 теңгеден асып, биржадағы сауда-саттық 518-519 теңге деңгейінде тіркелді. Орташа өлшенген курс 512,58 теңгені құрап, өткен күнмен салыстырғанда 2,4%-ға әлсіреді.

Ұлттық банк теңге бағамына сыртқы және ішкі факторлар әсер етіп жатқанын мәлімдеді.

– Бірқатар сыртқы іргелі факторлардың өзгеруі, атап айтқанда, АҚШ долларының жаһандық күшеюі, шикізат құнының өзгеруі және әлемдегі геосаяси жағдайдың шиеленісуі аясында дамушы нарық валюталарының әлсіреуі байқалады, – деп хабарлады Ұлттық банк.

Сарапшылардың пікірінше, АҚШ долларының күшеюі дәстүрлі түрде шикізат тауарлары үшін теріс фактор саналады. Сонымен қатар, Ресей рублінің жаңа санкциялардың енгізілуіне байланысты әлсіреуі де теңге бағамына әсер етіп жатыр. Қараша айының басынан бері рубль 18%-ға әлсіреп, Forex нарығында 1 АҚШ доллары үшін 114,5 рубльден асып кетті.

Ішкі нарықта шетел валютасына деген сұраныстың артуы мен ұсыныстың шектелуі де теңге бағамының төмендеуіне ықпал етті.

– Осы факторлардың жиынтығы теңгеге қысым түсіріп, кейбір сауда-саттық кезеңдерінде өтімділік төмен болып, алыпсатарлық әсерлерге жол берді. Бұл валюталық нарықтағы тепе-теңдікті бұзады, – деп түсіндірді Ұлттық банк.

Бағаның күрт ауытқуын болдырмау және айырбас бағамының шамадан тыс құбылмалылығын азайту мақсатында Ұлттық банк интервенциялар жүргізіп, шетел валютасын ұсыну жұмыстарын қамтамасыз етіп жатыр.