Ұлттық банк базалық мөлшерлемені тағы төмендетті

Ұлттық банктің Ақша-кредит саясаты комитеті базалық мөлшерлемені жылдық 17%-дан 16,75%-ға дейін төмендету туралы шешім қабылдады. Мөлшерлеме дәлізі плюс-минус 1 пайыздық тармақ деңгейінде сақталды.

Ұлттық банк бұл шешім жылдық инфляцияның төмендеуін ескере отырып қабылданғанын мәлімдеді. Реттеушінің түсіндіруінше, мөлшерлемені азайту ақша-кредит жағдайының қатаңдығын инфляция қарқынына сай біртіндеп түзетуге мүмкіндік береді.

Маусымда жылдық инфляция тоғызыншы ай қатарынан баяулап, 10,3%-ды құрады. Азық-түлік бағасының өсу қарқыны 10,7%-дан 10,4%-ға төмендеді. Азық-түлікке жатпайтын тауарлар инфляциясы 11,7% деңгейінде қалды.

Қызмет көрсету саласындағы инфляция 9%-ға жетті. Ұлттық банк мұны реттелмейтін қызметтердің қымбаттауымен түсіндірді. Ал реттелетін коммуналдық қызметтердің бағасы жылдық есеппен төмендеуін жалғастырған.

Реттеушінің бағалауынша, инфляцияның баяулауына жүргізіліп отырған ақша-кредит саясаты, теңге бағамының нығаюы, тұтынушылық белсенділіктің тұрақтануы, сондай-ақ Үкімет пен Ұлттық банктің инфляцияға қарсы шаралары ықпал етіп отыр.

Сонымен бірге экономикадағы белсенділік жеделдеген. Сыртқы нарықтарда құбылмалылық сақталып, инфляцияның қайта үдеу қаупі әлі де жоғары болып отыр.

Ұлттық банк негізгі тәуекелдер қатарында жанар-жағармай бағасының, тұрғын үй-коммуналдық қызмет тарифтерінің өзгеруін, халықтың тұтынушылық белсенділігінің күшеюін және сыртқы инфляцияның жеделдеуін атады.

Реттеуші алдағы шешімдер үшін инфляцияның қаншалық тұрақты төмендеп келе жатқанын, реттелетін тарифтердің өзгеруін және әлемдік отын мен тауар нарығындағы жағдайды бақыламақ.

Ұлттық банк базалық мөлшерлеменің алдын ала белгіленген бағыты жоқ екенін де атап өтті. Яғни келесі отырыстарда мөлшерлемені өзгеріссіз қалдыру да, экономикалық жағдайға қарай шешім бағытын өзгерту де мүмкін.

Базалық мөлшерлеме бойынша кезекті жоспарлы шешім 4 қыркүйекте жарияланады.

Бұған дейін, маусым айының басында, Ұлттық банк базалық мөлшерлемені 18%-дан 17%-ға дейін төмендеткен еді.