Ұлттық банк базалық мөлшерлемені көтерді

29 қарашада Ұлттық банк базалық мөлшерлемені 1 пайыздық тармаққа көтеріп, 15,25% деңгейіне жеткізді. Бұл шешім соңғы күндері байқалған теңгенің күрт әлсіреуі аясында қабылданды.

Базалық мөлшерлеме соңғы үш отырыста өзгеріссіз қалған еді. Бұл жолы көптеген сарапшы мөлшерлеме 14,25% деңгейінде қалады деп болжаған. Мысалы, Halyk Finance инфляцияның жеделдеуін Ұлттық қордан қосымша нысаналы трансферт бөлумен байланыстырған.

Ұлттық банктің мәліметінше, инфляцияның жеделдеуіне азық-түлікке жатпайтын тауарлар мен нарықтық қызметтердің қымбаттауы себеп болған. Бұған ел ішіндегі жоғары сұраныс пен бюджет кірісінің орындалмауы аясында жалғасып жатқан фискалдық ынталандыру ықпал еткен. Қазан айында халықтың инфляциялық күту деңгейі төмендегенімен, әлі де құбылмалы болып тұр.

Банк жаһандық инфляцияның баяулауы мен еңбек нарығындағы шиеленістің азаюы ақша-несие саясатын жеңілдетуге жағдай жасайтынын атап өтті. Алайда Қазақстан экономикасына әлемдік азық-түлік бағасының өсуінен туындаған сыртқы инфляциялық қысым әсер етіп жатыр.

Сонымен қатар, Ресейдегі жоғары инфляция мен айтарлықтай валюта бағамының ауытқуы Қазақстандағы инфляциялық күтулер мен белгісіздіктің артуына ықпал етуі мүмкін.

Ұлттық банк 2024 жылға арналған инфляция болжамын нақтылады. Жыл қорытындысы бойынша инфляция 8-9% аралығында болады деп күтіледі (қарашадағы көрсеткіш – 8,5%). Ал 2025 жылы баға өсімі 6,5-8,5% деңгейінде болжанса, 2026 жылы 5,5-7,5%-ға дейін төмендеуі мүмкін.

Бұл шешім теңгенің негізгі әлемдік валюталарға қатысты күрт әлсіреуі аясында қабылданды. 27 қарашада ұлттық валюта бір күнде 498-ден 502,45-ке дейін арзандады. 28 қарашада Қазақстан қор биржасында (KASE) доллар/теңге жұбы бойынша сауда көлемі рекордтық $73 млн-ға жетті.

28 қарашадағы сауда сессиясының жабылуында доллар 512 теңгеге жетті. Ал айырбастау орындарында 520 теңгеден асқан. 29 қарашада сауда ашылғанда теңге нығая бастады. Жарияланым сәтінде доллар 509,25 теңге деңгейінде саудаланып жатыр.

Бұл ақша-несие саясатына қатысты 2024 жылғы соңғы отырыс болды.