Ұлттық банк базалық мөлшерлемені 18% деңгейінде сақтады

Қазақстан Ұлттық банкінің Ақша-кредит саясаты комитеті базалық мөлшерлемені жылдық 18% деңгейінде, ±1 пайыздық тармақ дәлізімен сақтап қалу туралы шешім қабылдады.

Ұлттық банктің мәліметінше, бұл шешім жаңартылған макроэкономикалық болжамдар мен инфляциялық тәуекелдер теңгерімін ескере отырып қабылданған.

Ведомствоның хабарлауынша, ақпанда жылдық инфляция 11,7%-ға дейін төмендеп, болжамдарға сәйкес қалыптасты. Сонымен қатар инфляцияның барлық негізгі компоненттері бойынша баға өсімі баяулаған.

Атап айтқанда, азық-түлік тауарларының бағасы 12,7%-ға, азық-түлікке жатпайтын тауарлар 11,6%-ға, ал ақылы қызметтер 10,8%-ға өскен.

– Инфляцияның бәсеңдеуіне салыстырмалы түрде қатаң ақша-кредит шарттары, теңге бағамының нығаюы, кепілсіз тұтынушылық несиелеудің баяулауы, артық өтімділікті қысқарту шаралары, сондай-ақ Үкімет пен Ұлттық банктің антиинфляциялық шаралары әсер етті. Бұған қоса коммуналдық қызметтер мен жанар-жағармай бағасын көтеруге енгізілген мораторий де инфляцияның төмендеуіне ықпал етті. Ал қосылған құн салығының (ҚҚС) өсуінің инфляцияға әсері шектеулі деп бағаланады, – деп хабарлады Ұлттық банк.

Сонымен бірге ақпанда айлық инфляция жеделдеп, 1,1% болды. Базалық инфляция деңгейі 0,8%-ды құрады.

Ақша-кредит саясаты комитетінің базалық мөлшерлеме бойынша келесі жоспарлы шешімі 24 сәуірде жарияланады.