Үлкен концерттер мен матчтарда күзетті неге полиция атқарады? Бектенов жауап берді

Қазақстанда ірі концерттер мен спорттық іс-шараларда қауіпсіздікті қамтамасыз ету міндетін жекеменшік күзет құрылымдарына беру әзірге ерте. Бұл туралы премьер-министр Олжас Бектенов Мәжіліс депутаттарының сауалына берген жауабында айтты.

Премьердің сөзінше, халықаралық тәжірибеде коммерциялық іс-шаралардағы қауіпсіздікті жеке күзет ұйымдары қамтамасыз етеді, ал полиция мемлекеттік және қоғамдық-саяси іс-шараларда немесе төтенше жағдай кезінде ғана тартылады.

Алайда Қазақстандағы жекеменшік күзет ұйымдарының әлеуеті әзірге бұған толық дайын емес.

«Біздің елдегі жеке күзет құрылымдарының кәсіби дайындығы мен көпшілік жиналатын іс-шараларда жұмыс істеу тәжірибесі жеткіліксіз. Террористік қауіптің алдын алу, заманауи байланыс және басқару құралдарымен жабдықталу деңгейі де төмен. Сонымен қатар төтенше жағдайда қосымша күш пен техниканы жедел тарту мүмкіндігі шектеулі», – деді Бектенов.

Оның айтуынша, қазіргі таңда Қазақстанда полиция қызметкерлері қоғамдық тәртіп пен азаматтардың қауіпсіздігін қамтамасыз етуде негізгі рөл атқарып отыр.

«Полиция қылмыстың алдын алуда, адамдардың өмірі мен денсаулығын қорғауда, қоғамдағы тұрақтылық пен тыныштықты сақтауда шешуші рөл атқарады. Сондықтан жаппай іс-шараларда қауіпсіздікті қамтамасыз ету функциясын жеке күзет ұйымдарына беру әзірге ерте деп санаймыз», – деді премьер-министр.

Бұған дейін алматылықтар мен футбол жанкүйерлері «Қайрат» пен мадридтік «Реал» арасындағы тарихи матч кезінде Орталық стадион алдындағы адам көптігі мен ұйымдастырудағы олқылықтарға шағынған еді.