Ұлдана Мырзуанның қазасы: Әділет Зейнел 20 млн теңге көмекті қайда жұмсағанын айтты

Астанада фельдшер Ұлдана Мырзуанның қазасына қатысты сотта оның күйеуі Әділет Зейнел жауап берді. Ол марқұмның отбасына көрсетілген 20 млн теңге материалдық көмектің қалай жұмсалғанын айтып берді.

Зейнелдің сөзінше, Ұлдана қайтыс болғаннан кейін, 19 қарашада отбасы мүшелерімен Астана әкімдігінің өкілдері және мәслихат депутаты байланысқан. Кейін депутат оған және Ұлдананың әпкесіне 20 млн теңгені қолма-қол берген.

«20 млн теңгені үш күн ішінде алдық. Көлік несиесін төледім. Кейін банкке бардық, шоттар жабық болды, өйткені несиелерді алты айдан кейін ғана жабуға болатын еді. Қызметкерлер оның ай сайын 210-215 мың теңге төлегенін есепке алып, алдын ала шамамен 4,3 млн теңге екенін айтты. Қалған соманың 9,2 млн теңгесін көлік несиесіне жұмсадық. Кейін Ұлдананың анасына 4,5 млн теңге бердік. Одан әрі қой сойып, садақа беруге байланысты ұсақ шығындар болды», – деді ол сотта.

Әділет Зейнел қайғылы оқиға болған күнді де еске алды. Оның айтуынша, 2025 жылғы 8 қарашада ерлі-зайыпты жұмысқа бірге шыққан. Сағат 10:00 шамасында Ұлдана шақыртуға бара жатқанын жазған, содан кейін байланысқа шықпаған.

Шамамен сағат 10:50-де Зейнелге ауруханадан қоңырау шалып, қабылдау бөліміне түсіп, әйелін тануды сұраған. Оның айтуынша, Ұлдана ес-түссіз жатқан, басы мен денесі қан болған. Ол 10 күн бойы ауруханада жатып, 18 қарашада көз жұмды.

Еске салайық, 2025 жылғы 8 қарашада Астанада Тәуелсіздік даңғылындағы тоғыз қабатты үйдің сыртқы кірпіш қаптамасы опырылып түсті. Бес адам зардап шекті. Олардың арасында оқиға орнына көмек көрсетуге келген екі фельдшер болған.

23 жастағы Ұлдана Мырзуан ауыр бас жарақатын алып, оған ота жасалды. Алайда 18 қарашада ол ауруханада қайтыс болды.

Қылмыстық іс бойынша үйді басқарған МИБ төрайымы Сәуле Жұбаниязова сот алдында жауап беріп жатыр. Ол бұған дейін өзіне тағылған айыпты мойындамаған.