Украина Қазақстан мұнайы өтетін нысанға шабуыл жасағанын растады

Украина Қарулы күштері Ресейдегі стратегиялық маңызы бар энергетикалық инфрақұрылым нысандарына соққы жасағанын ресми түрде растады.

«Кеше Украина Қорғаныс күштері Ресей Федерациясының әскери және отын-энергетикалық инфрақұрылымының стратегиялық нысандарына дәл соққы жасады. Нәтижесінде Краснодар өлкесіндегі Ильский мұнай өңдеу зауыты зақымданып, ауқымды өрт болды. Сонымен қатар "Кропоткинская" және "Андриаполь" мұнай айдау станциялары істен шықты. Бұл нысандар басқыншыларға жанармай тасымалдауда маңызды рөл атқарған. Осы соққылардан кейін олардың жұмысы тоқтатылып, отын жеткізу логистикасы айтарлықтай қиындады», – делінген Украина Қарулы күштері Бас штабының мәлімдемесінде.

Украина әскері өздерінің «Ресейдің әскери агрессиясын қолдайтын стратегиялық нысандарға соққы жасауға құқығы бар» екенін атап өтті.

«Ресейдің заңсыз соғысын қаржыландыратын энергетикалық инфрақұрылым нысандарын жою операциялары жалғасады», – деп хабарлады Украина Қорғаныс министрлігі.

Еске салайық, 17 ақпанда Каспий құбыр консорциумының (КҚК) мұнай тасымалдау нысаны – "Кропоткинская" мұнай айдау станциясы жеті дронмен шабуылға ұшыраған еді. 18 ақпанда Қазақстан мұнайын айдау көлемі 30%-ға төмендеуі мүмкін екені белгілі болды. Бұл жағдай бір жарым-екі айға созылуы ықтимал.