Украина Каспий құбыр консорциумына жасалған шабуылға түсініктеме берді

Украина Сыртқы істер министрлігі Каспий құбыр консорциумының (КҚК) инфрақұрылымына жасалған шабуылдарға байланысты Қазақстанның наразылығына ресми түсініктеме берді.

Украина СІМ-нің мәлімдемесінде Киевтің ешбір әрекеті Қазақстанға немесе басқа да үшінші елдерге қарсы бағытталмағаны атап өтілген.

«Украина Каспий құбыр консорциумы инфрақұрылымына қатысты Қазақстан Республикасының алаңдаушылығын назарға алды. Украин тараптың ешбір іс-қимылы Қазақстанға немесе басқа елдерге қарсы бағытталған емес. Біздің барлық күш-жігеріміз Ресейдің ауқымды агрессиясын тойтаруға және халықаралық құқық шеңберінде өзін-өзі қорғау құқығын жүзеге асыруға бағытталған», – делінген хабарламада.

Сондай-ақ Украина тарапы Қазақстанның бұған дейін Ресейдің Украинаға жасаған соққыларына байланысты үнсіз қалғанын еске салды.

«Біз Қазақстан тарапынан Ресейдің Украинадағы бейбіт тұрғындарға, тұрғын үйлерге және энергетикалық инфрақұрылымға, соның ішінде атом электр станцияларының қосалқы станцияларына жасаған соққыларын айыптаған мәлімдемелердің болмағанына назар аударамыз», – деді Украина СІМ.

Киев барлық елдерді Ресейдің соғысты тоқтатуына ықпал етуге шақырды және Қазақстан халқына деген құрметін, сондай-ақ достық әрі прагматикалық қарым-қатынасты дамытуға ниетті екенін растады.

«Біз қазақстандық халыққа құрметпен қараймыз және елдеріміз арасындағы тарихи байланыстар деңгейіне сай достық қатынастарды нығайтуға бейілдіміз», – делінген мәлімдемеде.

Еске сала кетсек, бұған дейін Қазақстан Сыртқы істер министрлігі КҚК нысандарына жасалған соққыларға байланысты Украина тарапына наразылық білдірген болатын.