Украина елшісі Қазақстанның мұнай танкерлеріне жасалған шабуылдарға Киевтің қатысы барын жоққа шығарды

Украинаның Қазақстандағы елшісі Виктор Майко Каспий құбыр консорциумының танкерлері мен инфрақұрылымына жасалған шабуылдарға Украина қарулы күштерінің қатысы барын жоққа шығарды. Оның мәлімдемесін 21 шілдеде Times of Central Asia басылымы жариялады.

Дипломаттың айтуынша, Киев Қазақстанның мұнай танкерлеріне жасалған соққыларға қатысты алаңдаушылығын түсінеді. Алайда шабуылдарды Украина тарапы жасағанын дәлелдейтін айғақ жоқ екенін мәлімдеді.

Виктор Майко Ресейдің украин дрондарын радиоэлектрондық күрес құралдары арқылы істен шығарып, кей жағдайда бақылауына алуы мүмкін екенін айтты. Осыған байланысты ол дрондарды арандату және Украинаны қаралау мақсатында пайдалану мүмкіндігін мұқият тергеуге шақырды. Бұл мәлімдемеге Ресей тарапының жауабы берілген жоқ.

«Қазақстан, оның азаматтары, инфрақұрылымы мен экономикалық мүдделері Украина тарапынан ешқашан әскери нысана ретінде қарастырылған емес және қазір де қарастырылмайды», – делінген елші мәлімдемесінде.

17, 19 және 20 шілдеде Новороссийск маңындағы КҚК теңіз айлағына мұнай тиеуге келген танкерлерге дрондар шабуылдаған. Қазақстанның Сыртқы істер және Энергетика министрліктері шабуылдарды тоқтатуға шақырып, оларды елдің экономикалық мүддесіне қол сұғу деп бағалады. Қазақстан тарапы шабуылды кім жасағанын атаған жоқ.